Fundi i mandatit të Mogherinit, afat për marrëveshjen Kosovë – Serbi?

Fundi i mandatit të Mogherinit, afat për marrëveshjen Kosovë – Serbi?

Teksa bisedimet po hyjnë në fazën e fundit, po diskutohet edhe sa do të zgjasin. Presidenti Thaçi para takimit të fundit në Bruksel tha se marsi i vitit të ardhshëm mund të jetë koha kur do të arrihet marrëveshja Kosovë – Serbi. Pas kësaj reagoi pala serbe kundër afatizimit. Ndërkohë, Bekim Çollaku, shef i stafit të Presidentit, ka thënë të mërkurën për Gazetën Express se periudha optimale për fundin e bisedimeve është 6 – 8 muaj, që ndërlidhet edhe me përfundimin e mandatit të institucioneve aktuale të BE-së, përfshirë edhe të Mogherinit.
Përveç beneficioneve të larta, me pagë mbi 20 mijë euro në muaj, Shefja e Politikës së Jashtme të BE-së, Federica Mogherini, të cilës i njihen disa merita për negocimin e marrëveshjes nukleare me Iranin, mund të marrë kredit edhe për marrëveshjen Kosovë – Serbi.

Natyrisht, gjithçka varet nëse diplomates italiane, jo edhe me aq përvojë, do t’i shkojë për dore t’i bindë palët që të nënshkruajnë marrëveshjen për normalizimin e marrëdhënieve ndërmjet Kosovës dhe Serbisë.

Një negociatore tjetër e BE-së që ka mbajtur postin e Përfaqësues së Lartë të BE-së për Politikë të Jashtme, Baronesha Ashton, kishte arritur një sukses të kufizuar. Ashton kishte ndërmjetësuar 10 raunde takimesh ndërmjet Thaçit e Daçiqit, si kryeministra të dy vendeve, ndërkohë që raunde të pafundme negociatash ishin zhvilluar në nivel më të ulët.

Pavarësisht se në praktikë marrëdhëniet Kosovë – Serbi kanë mbetur në nivel armiqësie, Ashton, Thaçi dhe Daçiq ishin nominuar për Çmimin Nobel nga Dhoma e Përfaqësuesve në SHBA dhe Aleanca Progresive e Socialistëve dhe Demokratëve në Parlamentin Evropian.

Por, historia nuk është ndalur këtu.

Përpjekjet për të arritur një marrëveshje Kosovë – Serbi i vazhdoi Federica Mogherini, diplomatja italiane e cila para dy javësh bashkë me Thaçin dhe Vuçiqin ka nisur fazën e fundit të bisedimeve.

Vetë Përfaqësuesja e Lartë në janar të këtij viti ka thënë se një marrëveshje Prishtinë-Beograd, e cila sipas të gjitha gjasave, si epilog do të ketë normalizimin e raporteve, pa njohje të Kosovës nga Serbia, është e mundur deri në fund të mandatit të institucioneve aktuale të BE-së, më 2019.

Presidenti Thaçi para nisjes së takimit të fundit në Bruksel tha se marsi i vitit të ardhshëm mund të jetë koha kur do të arrihet marrëveshja Kosovë – Serbi. Pas kësaj reagoi pala serbe kundër afatizimit.

Ndërkohë, Bekim Çollaku, shef i stafit të Presidentit ka thënë për Gazetën Express se periudha optimale për fundin e bisedimeve është 6 – 8 muaj. Ai, po ashtu, e ka ndërlidhur këtë me përfundimin e mandatit të institucioneve aktuale të BE-së, përfshirë edhe të Mogherinit.

“Tanimë, mund të konsiderohet sekret publik fakti që të gjitha palët e përfshira në dialogun për normalizimin e marrëdhënieve ndërmjet Kosovës dhe Serbisë, konsiderojnë se dritarja optimale kohore për arritjen e marrëveshjes eventuale përfundimtare ndërmjet dy shteteve, është periudha kohore 6 deri në 8 muaj”, ka thënë Çollaku.

“Sigurisht se periudha në dispozicion ndërlidhet me shumë faktorë, mirëpo thelbësor konsiderohet ai që ndërlidhet me përfundimin e mandatit të institucioneve aktuale të BE-së dhe zgjedhjeve të reja që do të mbahen në maj 2019”, ka shtuar Çollaku.

Këshilltari kryesor i Thaçit në përgjigjet për Gazetën Express thekson se Mogherini është shumë e interesuar ta rrisë dinamikën e takimeve.

“Edhe akterët e tjerë ndërkombëtarë mendojnë se ky është momentumi më i mirë i mundshëm për të nxitur palët për të arritur marrëveshje. Për më tepër, është logjike që të bëhet edhe një përpjekje e madhe për të arritur një marrëveshje përfundimtare sepse asnjë nga palët e përfshira në këto negociata, nuk ka mundësi që jetë pjesë e një procesi të tillë në pafundësi”, thotë ai.

Tashmë dihet se në këtë proces janë të përfshirë edhe palë tjera përveç BE-së, si kancelarja gjermane Angela Merkel me përpjekje personale, administrata e SHBA-së, ndërkohë që tema Kosovë – Serbi mendohet se mund të jetë edhe në agjendën Trump-Putin, më 16 korrik në Helsinki.

Hashim Thaçi, në anën tjetër, po përpiqet me mjaft siklet të sigurojë mbështetjen e partive që të bëhen pjesë e negociatave në një ekip uniteti, të ngjashëm me atë të krijuar për bisedimet në Vjenë, në vitin 2005 nga Ibrahim Rugova.

Por, ai i dëmtoi mjaft këto përpjekje kur pas kthimit nga Brukseli me deklarata të pamatura tha se në këtë përballje me Serbinë procesi nuk ka vija të kuqe.

 

SKA KOMENTE

Lini një përgjigjje